Martin - Gitarre mit Hut!

Egal ob auf der Bühne oder auch bei administrativen Abläufen ist Martin immer ein zuverlässiger Band-Genosse. 

Und so hät alles mit mir agfange…

Ich han  mich scho s‘ganze Läbe zum Rock hizoge  gfühlt.

Früener, im Teenie-Alter sind‘s d‘ Röck vo de Fraue gsi, und hüt, wo mini Frau d’Hose ahät, isches d’Rock-Musig :-)

Mini Laufbahn bi Altöl hät dänn au nacheme  Rockkonzert im Februar 2006 in Cham agfange. Will ich die Band mega geil gfunde ha, hani  de Sänger gfröget öb ich dörf hälfe abbaue, was au nöd jede macht. De Stephan isch dänn au ächli verwirrt gsi und hät mich dänn zum Gitarrischt Les wiiter verwise. Und so bini dänn bi de Konzert mit Altöl debii gsi, wenn immer es mir möglich gsi isch und ha ghulfe bim uf- und abbaue; und ha als wilde Fän für gueti stimmig vor de Büni gsorget.

Im Mai 2011 hani dänn es Telefon vom Stephan übercho, öb ich gern würdi als Gitarrischt bi Altöl istige, da de Les nach Paraguay uswandere wird. Mini prompti Zuesag hätt de Stephan dänn scho wieder verwirrt, will er eigentlich mit ere Absag grächnet hätt, wiso au immer…, villicht, will er mir lieber bim Chischte schleppe zuegluegt hätt ...

Uf jede Fall hani mi dänn grad mit Marshall und Rockgitarre ideckt und ha mich flissig für mine erschti Gig uf de Büni mit Altöl bi de "Rock Nacht" in Feusisberg vorbereitet.

Mir händ mächtig viel Spass zäme und verstönd öis mega guet, sigs bim nöi Songs schriibe, bim Videodrehe oder a öisne Uftritt.

Es lauft immer öpis bi Altöl. Und jetzt wo jede si bitrag i di nöi websiite mit ibringe cha, lohnt sich au vermehrt e Bsuech da druf.

Also bis dänn, lass dich immer wider überrasche,  sigs uf üsere site oder no besser a eim vo üserne Konzert. Und wenn nöd so lang wotsch warte, dänn buech öis doch eifach….

Häsch nöd alles verstande was ich g‘schribe ha, macht nüd.. schriib mir und ich lifere dir d‘Übersetzig uf Hochdütsch :)